२० मंसिर २०७८, सोमबार
December 6, 2021, Monday

वैकल्पिक राजमार्ग निर्माणको काम तीव्र

वैकल्पिक राजमार्ग निर्माणको काम तीव्र

राष्ट्रिय गौरवको योजना मानिएको सुनसरीको धरान–चतरा, गाईघाट–कटारी र सिन्धुली–हेटौँडा सडक आयोजनाको पूर्वी खण्ड निर्माण तीव्र रुपमा अघि बढेको छ ।

भित्री मधेशलाई काठमाडौँसँग जोडने सबैभन्दा छोटो उक्त राजमार्गको सुनसरी, उदयपुर र सिन्धुली खण्डमा सडक संरचना र पुल निर्माण गर्ने काम धमाधम अघि बढेको छ । उदयपुरको चौदण्डीगढी नगरपालिका–४ वीरेन्द्र चोकदेखि सिन्धुलीको भिमान सम्मका विभिन्न भागमा कल्भर्ट र पुलपुलेसा निर्माण भइरहेका छन् ।

डेढ वर्षअघि निर्माण शुरु भएको वैकल्पिक उक्त राजमार्गको करीब ३५ प्रतिशतभन्दा बढी काम पूरा भइसकेको आयोजना कार्यालय गाईघाटले जनाएको छ । धरान–चतरा, गाईघाट–कटारी तथा सिन्धुली–हेटाँैडा सडक आयोजना पूर्वी खण्डमा १३४ किलोमिटर सडक पर्छ । सडक ११ मिटर फर्मेशन चौडाइ भएको कालोपत्रयुक्त हुने आयोजना कार्यालयले जनाएको छ ।

घरटहराको मुआब्जा निर्धारण, वन क्षेत्रका रूख हटाउने कार्य र पुल निर्माण हुने स्थानमा हुने विवाद मिलान भएसँगै सडक निमार्णले गति लिएको निमार्णाधीन धरान–चतरा, गाईघाट–कटारी र सिन्धुली–हेटौँडा सडक आयोजना पूर्वी खण्ड गाईघाटका आयोजना प्रमुख उमेशविन्दु श्रेष्ठले बताउनुभयो ।

आर्थिक प्रगति लक्ष्यअनुसार भएका कारण आयोजनाको कामले तीव्रता लिएको हो । हालसम्म भौतिक रूपमा ३५ प्रतिशतभन्दा बढी काम सम्पन्न भइसकेको छ । श्रेष्ठका अनुसार सडक विस्तार हुने सिन्धुली क्षेत्रमा मुआब्जा निर्धारण भइसकेको र घरटहराका कारणले काम रोकिने अवस्था अन्त्य भएकोले छिट्टै निर्माण सकिने बताउनुभयो ।

उदयपुरतर्फको मुआब्जासम्बन्धी फाइल जिल्ला प्रशासन कार्यालयमा पेश गरी सकिएको आयोजन प्रमुख श्रेष्ठले बताउनुभयो । मुआब्जाको निवेदन दिन छुटेकाका लागि निवेदन दिन र लगत कट्टा गर्न शुरु भइसकेको छ । केही दिन भित्रै मुआब्जाको विषय टुंगिने उहाँले बताउनुभयो ।

विभिन्न स्थानमा सडकको सब ग्रेड, सब बेस, होम पाइप, स्लाभ कल्भर्ट, मेसिनरी वाल लगायतका काम भइरहेको निर्माण व्यवसायी जेडआइइसी शर्मा लामा जोइन्ट भेन्चरका डेपुटी कन्ट्याक्ट म्यानेजर इन्जिनियर सीताराम दाहालले बताउनुभयो । उदयपुरतर्फ निर्माणमा खासै अवरोध नभए पनि सिन्धुलीतर्फ विद्युत्ले पोल हटाउन ढिला गरेको छ ।

सडक योजना तीन वर्षभित्र सम्पन्न गर्ने गरी निर्माण गरिसक्ने लक्ष्य राखी २०७३ साल कात्तिक २२ गते निर्माण व्यवसायी जेडआइइसी शर्मा लामा जोइन्ट भेन्चरसँग रु सात अर्ब ३६ करोड ९९ लाख ८४ हजारमा ठेक्का सम्झौता भएको थियो । राजमार्गले उदयपुरको वेलका नगरपालिका, चौदण्डीगढी नगरपालिका, त्रियुगा नगरपालिका, उदयपुर गढीगाउँपालिका र कटारी नगरपालिकाका स्थानीयवासीलाई फाइदा पुग्नेछ भने सिन्धुलीतर्फ दुधौली नगरपालिका र कमलामाई नगरपालिका हुँदै हेटौँडासम्म सडक पुग्नेछ ।

वैकल्पिक मार्गको निर्माणमा अवरोध नआए निर्धारित समयमै निमार्ण सम्पन्न हुने स्थानीयवासी बताउँछन् । आफ्नै घरआँगनमा राजमार्ग निर्माण शुरु भएसँगै स्थानीयवासी हर्षित छन् । राजमार्ग बनेपछि काठमाडौँसँग सहज यातायातको पहँुच हुनेछ । रासस

Related News

लकडाउन हुँदैन, यसबारे सरकारले केही निर्णय गरेको छैन : स्वास्थ्य मन्त्रालय
लकडाउन हुँदैन, यसबारे सरकारले केही निर्णय गरेको छैन : स्वास्थ्य मन्त्रालय
  • ९ जेष्ठ २०७५, बुधबार

स्वास्थ्य तथा जनसंख्या मन्त्रालयले बाहिर हल्ला फैलिएजस्तो लकडाउनबारे निर्णय नभएको जनाएको छ । सोमबार ओमिक्रोनका २ जना संक्रमित भेटिएपछि स्वास्थ्य...

औद्योगिक करिडोरमा मागेजति बिजुली दिने तयारीमा विद्युत् प्राधिकरण
औद्योगिक करिडोरमा मागेजति बिजुली दिने तयारीमा विद्युत् प्राधिकरण
  • ९ जेष्ठ २०७५, बुधबार

हरेक युनिट बिजुलीलाई आर्थिक उत्पादनमा जोड्ने र देशभित्रै खपत बढाउने लक्ष्यका साथ नेपाल विद्युत् प्राधिकरणले योजनावद्ध रुपमा प्रयास थालेको छ...

केन्द्रीय महाधिवेशन तयारीबारे सभापति देउवाले छलफल गर्नुहुँदै
केन्द्रीय महाधिवेशन तयारीबारे सभापति देउवाले छलफल गर्नुहुँदै
  • ९ जेष्ठ २०७५, बुधबार

प्रधानमन्त्री एवम् नेपाली काँग्रेस सभापति शेरबहादुर देउवाले पार्टीको १४ औं केन्द्रीय महाधिवेशन तयारीका सम्बन्धमा सोमबार दिउँसो ४ : ३० बजे...

TOP