२१ मंसिर २०७८, मंगलवार
December 7, 2021, Tuesday

एकल हुनुको मज्जा

एकल हुनुको मज्जा

कति बिहे र जोडीका कुरा गर्नु ? आउनुस्, एक्कैछिन एकल जीवनको रमाइलोबारे पनि गफ्फिऔँ ।
के तपाईं एकल हुनुहुन्छ ? दाैंतरीहरु जोडी बाँधेर रमाइरहेको देख्दा आफूलाई एक्लो महसुस गर्नुहुन्छ होला । खुसी रहन तपाईं आफू एक्लो नै काफी छ । एकल रहेर पनि तपाईं यसरी रमाउन सक्नुहुन्छ ।
एकल हुँदा तपाईं स्वतन्त्र र निस्फिक्री रहनसक्नु हुन्छ । जबकि कुनै सम्बन्धमा रहँदा आफ्नो मात्र नभई आफ्नो मायालुको बारेमा पनि धेरै सोच्नुपर्ने हुन्छ । जसले तपाईंको दैनिकीमा तनाब थपिदिन्छ ।
भर्खरै ब्रेकअपबाट तपाईं एकल हुनुभएको छ वा अझै जोडी भेटिएको छैन भने पनि पीर नगर्नुहोस् । मस्तिष्कबाट नकारात्मक पाटाहरुलाई चटक्कै भुल्न र एकल भए पनि सकारात्मक सोच राख्नका लागि तपाईंलाई यी कुराले मद्दत गर्न सक्छन् ।
आफैंले आफैँलाई चिन्नुहोस्
एक्लै हुँदा तपाईंले आफ्नो सम्पूर्ण खाली समयलाई आफ्नै विकासका लागि खर्चन सक्नुहुन्छ । तपाईंले चाहेका तर समय अभावले गर्न नसकेका कार्यलाई निरन्तरता दिन सक्नुहुन्छ । तपाईंले आफ्ना निजी रुचिलाई प्राथमिकता दिन सक्नुहुन्छ । शारीरिक व्यायाम गर्ने, नयाँ भाषा सिक्ने र केही सामाजिक कामहरुमा संलग्न हुन सक्नुहुन्छ । विगतलाई सम्झेर दुःख मनाउ गर्न छोडिदिनुहोस् । मस्तिष्क र शरीरमा स्फूर्ति ल्याउनुहोस् र आफूलाई नयाँ मानिसका रुपमा निर्माण गर्नुहोस् ।
आफ्नै समय, आफ्नै काम
सम्बन्धमा रहँदा एकअर्कालाई सानाभन्दा साना कुराहरु पनि सेयर गरिरहनुपर्ने बाध्यता हुन्छ । जस्तैः घरमा आज के पाक्यो, खाना मीठो लाग्यो कि लागेन, पाहुना कतिजना आएजस्ता झिनामसिना कुराहरु बताइरहनुपर्छ । तपाईं एक्लो रहँदा यी सबै कुराहरुको झन्झट हुँदैन । तपाईं आफ्ना कार्यहरुलाई मात्र फोकस गर्न सक्नुहुन्छ । अझ कामहरुलाई तालिका बनाएर योजनाबद्ध तरिकाले काम भ्याउन सक्नुहुन्छ ।
साथीसँग नयाँ ठाउँ घुम्नुहोस्
एक्लो हुनुको रमाइलो फाइदा भनेकै तपाईंले साथीभाइलाई समय दिन सक्नुहुन्छ । सम्बन्धमा रहनेहरु आफ्नो मायालुका कारण साथीभाइलाई समय दिन भ्याउँदैनन् । घुमघाम र सभा समारोहका लागि बनाइएका योजना पनि सफल हुन सक्दैनन् । साथीभाइसँगको समारोहरुमा मायालुकै कारण आफूलाई एकलकाँटे बनाउनुपर्ने झन्झन्ट हुन्छ । साथीभाइसँग रमाइरहँदा मायालु चिढिन सक्ने अवस्था पनि आउन सक्छ । एक्लाहरुले मायालुको तनाव नलिई साथीभाइसँगको जमघटलाई पूर्ण मित्रवत् बनाई मज्जाले रमाउन सक्छन् ।
नयाँ कुराको थालनी
हामी सबैका आ–आफ्नै रुचि–अभिरुचि हुन्छन् । सम्बन्धमा रहँदा बस्दा तपाईं आफ्ना रुचिहरुलाई कुल्चेर हिँड्नुपर्ने बाध्यता हुन्छ । तपाईंले नयाँ कामलाई सुरुवात गर्न नसकेको समेत हुन सक्नुहुन्छ । उदाहरणका लागि तपाईंले स्विमिङ सिक्न खोज्दा नभ्याएको हुन सक्नुहुन्छ । एक्लो रहँदा तपाईंलाई रोक्ने हो हुन्छ ? जानुस् पानीमा डुबेर पौडीको मज्जा लिनुस् । त्यस्तै कामबाट बचेको समयलाई तपाईंले स्फूर्तिको समयका रुपमा पुस्तक पढ्ने, फिल्म हेर्ने, साइक्लिङ गर्ने जस्ता कामहरु गर्न सक्नुहुन्छ ।
सामाजिक सञ्जालमा सक्रिय हुनुहोस्
सम्बन्धमा रहँदा तपाईंको सामाजिक सञ्जाल प्रयोग गर्दाको समय जाँचपड्ताल भइरहेको हुन सक्छ । सामाजिक सञ्जालमा पोस्टिने फोटो, पोस्ट, कमेन्ट, लाइक र सेयरमा समेत निगरानी हुन्छ । अझ भन्दा तपाईंमाथि एक किसिमको लगाम लगाइएको हुन्छ । तपाईं एक्लो रहँदा पूर्ण स्वतन्त्र हुने हुँदा तपाईंलाई केही कुराको चिन्ता हुँदैन । तपाईंले आफ्ना भावनाहरुलाई साथीभाइसँग खुलस्त साट्ने, पोस्ट, लाइक, कमेन्ट गर्ने स्वतन्त्रता मिल्छ ।
मोबाइलको कम प्रयोग
सम्बन्धमा रहनेहरु सदैव फोनको सामीप्यमा रहनुपर्ने एक किसिमको बाध्यता नै हुन्छ । आउने फोन र एसएमएसको मात्र नभई तपाईंले मिसकलको समेत ख्याल गर्नुपर्छ । मायालुलाई रिझाइरहनुपर्छ । तपाईंले फोन नउठाउँदा, म्यासेज नर्फकाउँदा मायालु रिसाउने सम्भावना हुन्छ । मोबाइलमा धेरै समय खर्चनु भनेको तपाईंले आफ्नो स्वास्थलाई आफैँले बिगार्नुसमेत हो । एकलहरुलाई फोन तथा ग्याजेडको त्यति आवश्यकता वा भनौं प्रयोग गर्नुपर्ने हुँदैन । विद्युतीय सामग्री कम प्रयोग गर्दा तपाईं प्राकृतिक संसारमा रमाउने मौका समेत पाउनुहुनेछ ।
फजुल खर्चको वचत
सम्बन्धमा रहँदाको तपाईं र एकल तपाईंमा निकै भिन्नता हुन्छ । एकल रहँदा तपाईंको खर्चसमेत जोगिन्छ । महँगा उपहार, फिल्म र खानपानको रकम जोगिन्छ । सम्बन्धमा रहँदा बिदा मनाउँदाको खर्च, भेटघाटको खर्च र अन्य फजुल खर्च तपाईंका लागि बोझ हुन्छ । एकल रहँदा यसरी खर्च नभएको रकमलाई तपाईंले अन्यत्र लगानी गर्न सक्नुहुन्छ ।
बलजफ्ती सम्बन्धबाट छुटकारा
सम्बन्धमा रहँदा तपाईंलाई मायालुको मात्र नभई उसको परिवार, आफन्त र केही अवस्थामा पाल्तु जनावरको समेत ख्याल गर्नुपर्ने हुन्छ । यो भनेको तपाईंले आफ्ना लागि भन्दा पनि अरुका लागि बाँच्नुपर्ने, काम गर्नुपर्ने किसिमको अवस्था सिर्जना हुन जान्छ । एकल तपाईंलाई अरुका बारेमा नसोची पूर्ण रुपमा आफ्नो बारेमा मात्र सोच्न समय हुन्छ ।
सबैकुराका केही न केही फाइदा बेफाइदा पक्कै हुन्छन् । सम्बन्ध निकै मूल्यवान् चीज हो तर यसो भन्दैमा सम्बन्ध नभएका वा टुटुेकाहरु निराश भएरै बस्नुपर्छ भन्ने छैन । मस्तिष्क मात्र नभई शरीरलाई पनि शान्त रहन एक्लो मानिस नै काफी हुन्छ । एकल रहने महिला र पुरुष आफ्ना बारेमा मात्रै सोच्दै आफैँलाई निर्माण गर्न सक्छन् । कोही कसैको भर पनि पर्नु पर्दैन । उसो भए एक्लो हुनुको पनि मज्जा छ, हैन त ?

Related News

भारतमा दैनिक संक्रमितको संंख्या डेढ वर्षपछिकै कम
भारतमा दैनिक संक्रमितको संंख्या डेढ वर्षपछिकै कम
  • १५ मंसिर २०७४, शुक्रबार

भारतमा कोरोना भाइरसबाट दैनिक संक्रमितको संख्या निकै कम भएको छ । अधिकारीहरुले पछिल्लो एक दिनमा डेढ वर्षपछिकै सवैभन्दा कम संक्रमित...

प्रतिनिधिका लागि सुन्धारा, ठमेल र गौशालाका ८६ वटा होटल बुकिङ
प्रतिनिधिका लागि सुन्धारा, ठमेल र गौशालाका ८६ वटा होटल बुकिङ
  • १५ मंसिर २०७४, शुक्रबार

नेपाली काँग्रेसको यही मङ्सिर २४ गतेदेखि सुरु हुने १४औँ महाधिवेशनमा भाग लिन काठमाडौं आएका महाधिवेशन प्रतिनिधि बस्नका लागि तीन ठाउँमा...

यसवर्ष ढोरपाटनमा चुके सिकारी
यसवर्ष ढोरपाटनमा चुके सिकारी
  • १५ मंसिर २०७४, शुक्रबार

ढोरपाटन सिकार आरक्षमा यस बर्षको पहिलो सिकारयाममा तीन नाउर र एक झारलको सिकार हुन सकेन । दुई नाउरको सिकारमा सिकार...

TOP