कहिले सकिएला नागढुंगा सुरुङमार्ग ?

काठमाडौं भित्रने र बाहिरिने मुख्य नाका रहेको नागढुंगा सुरुङमार्गको ५३ प्रतिशत काम सम्पन्न भएको छ ।
विभिन्न विकास पूर्वाधारको निर्माणअन्तर्गत नागढुंगा सुरुङमार्गको काम धमाधम भएको हो । अब सुरुङको सबै काम सम्पन्न गर्न ४७ प्रतिशत काम बाँकी रहेको आयोजना निर्देशक नरेशमान शाक्यले बताए । सुरुङमार्ग समयमा नै सम्पन्न हुन भने केही कठिन देखिएको छ ।

आयोजनाअन्तर्गत सुरुङमार्गको प्रगति आधाभन्दा बढी भए पनि अन्य संरचनासमेतको समग्र भौतिक प्रगति भने साढे ३७ प्रतिशत सम्पन्न भएको छ । आयोजनाको वित्तीय प्रगति भने साढे ४५ प्रतिशत पुगेको छ ।

निर्माणाधीन नागढुंगा सुरुङमार्गको अडिट र मुख्य सुरुङ गरी कुल ५ हजार ४ सय ९९ मिटर लम्बाइको सुरुङमार्ग खन्नुपर्नेछ । त्यसमध्ये २६ जेठसम्म २ हजार ९ सय १ मिटर खनिसकिएको छ ।

आयोजनामा मुख्य सुरुङको लम्बाइ २ हजार ६ सय ८८ मिटर रहेको छ । त्यसमध्ये अहिलेसम्म १ सय २ सय ८३ मिटर सम्पन्न भएको छ । इभ्याकुएसन सुरुङ कुल २ हजार ५ सय ५७ मध्ये १ हजार ४ सय ४४ र क्रस प्यासेज कुल १ सय २८ मिटरमध्ये ४८ मिटर खनिएको छ । वर्किङ अडिट १ सय २६ मिटरमा पुरै सम्पन्न भइसकेको छ । आयोजनाका अनुसार खनिएको कुल लम्बाइमध्ये काठमाडौंतर्फ १ हजार ५ सयउ ३० र धादिङतर्फ १ हजार ३ सय ७१ मिटर खनिएको छ ।

आयोजनाका लागि ३ वटा अन्डरपास निर्माण गर्नुपर्नेमा अहिलेसम्म २ वटा सम्पन्न भइसकेको छ । एउटा ओभर पास निर्माण गर्नुपर्नेमा सम्पन्न भएको छ । बक्स कल्भर्ट ४ वटै निर्माण सम्पन्न भएको छ ।

काठमाडौंतर्फ निर्माण गर्नुपर्ने एउटा फ्लाइओभर निर्माणस्थलको भने अहिले जग्गा प्राप्तिका लागि मुआब्जा दिने काम भइरहेको आयोजनाले जनाएको छ ।

४२ महिनामा सम्पन्न गर्ने गरी सो आयोजना २०७६ साल कात्तिकमा निर्माण सुरु भएको थियो । जापानी निर्माण संस्था हाजमा आंदो कर्पोरेसनसँग २०७६ असोजमा सम्झौता भई निर्माण भइरहेको छ । शाक्यले आयोजना सम्पन्न गर्न ३ महिना समय थप गरिएको र उक्त समयभित्रै काम सम्पन्न गरिने जनाएका छन् ।

नागढुंगा सुरुङमार्ग जापान सरकारको सहयोगमा जापानी निर्माण कम्पनीद्वारा निर्माण भइरहेको राष्ट्रिय प्राथमिकताको आयोजना हो ।
नागढुंगा–नौबिसे सुरुङमार्ग लागि जापानी सहयोग नियोगले १६ अर्ब रुपैयाँ सहुलियत ऋण सहयोग दिएको छ । उक्त ऋण ४० वर्षमा तिरिसक्नुपर्नेछ भने ब्याज शून्य दशमलव शून्य एक (०.०१) प्रतिशत रहेको छ । २२ अर्ब रुपैयाँ लागत अनुमान गरिएको आयोजना ६ अर्ब रुपैयाँ नेपाल सरकारले आन्तरिक स्रोतबाट बेहोर्ने छ ।

करिब २ दशमलव ६ किलोमिटरको यो सुरुङमार्ग चन्द्रागिरी नगरपालिका–१ टुटीपाखाबाट धादिङको धुनिबेंसी नगरपालिकाको सिस्नेखोला निस्किनेछ । दुई लेनको यो सुरुङमार्गसँगै समानान्तर हुने गरी इभाकुएसन टनेल समेत निर्माण भइरहेको छ । आपत्कालीन रूपमा प्रयोग गर्न इभाकुएसन टनेल निर्माण गरिएको हो ।

सुरुङमार्ग निर्माणका लागि ६ वटा कम्पनीले टेन्डरमा सहभागिता जनाएका थिए । जसमा ५ वटा चिनियाँ कम्पनी थिए भने एउटा जापानी कम्पनी रहेको थियो ।

सुरुङमार्ग २ दशमलव ६ किमी लामो बन्नेछ । सुरुङमार्ग निर्माणपछि भने नागढुंगा–सिस्नेखोलाको दूरी सवा ३ किमिमा झर्नेछ । अहिले यो दूरी साढे ८ किमि रहेको छ ।

आयोजनाअन्तर्गत सुरुङमार्गसँगै गुर्जुधाराबाट पश्चिमतर्फ ६ सय मिटरको फ्लाइओभर पनि बनाउने योजना छ । उक्त फ्लाइओभर नेपालकै पहिलो हुने जनाइएको छ ।Source