थप ३९० जनामा कोरोना संक्रमण पुष्टि, पाँचको मृत्यु

देशभर थप तीन सय ९० जनामा कोरोना संक्रमण पुष्टि भएको छ। स्वास्थ्य तथा जनसंख्या मन्त्रालयले सोमबार सार्वजनिक गरेको विवरणअनुसार पछिल्लो २४ घन्टामा पिसिआर परीक्षणमा तीन सय ७१ र एन्टिजेन परीक्षणमा १९ जनामा संक्रमण देखिएको हो।

यो अवधिमा दुई हजार ६ सय ६ जनाको पिसिआर परीक्षण र दुई हजार चार सय २० जनाको एन्टिजेन परीक्षण गरिएको थियो।

हाल देशभर सात हजार ६ सय ५४ जना सक्रिय संक्रमित रहेका छन्। सोमबार चार सय २५ जना कोरोना संक्रमणमुक्त भएका छन्।

पछिल्लो २४ घन्टामा पाँचजना संक्रमितको मृत्यु भएको छ। हालसम्म मृत्यु हुने संक्रमितको संख्या ११ हजार चार सय ५३ पुगेको छ।