भारतीय अटो कम्पनी टाटा मोटर्सको विक्री २७ प्रतिशतले बढ्यो

भारतीय  अटो कम्पनी टाटा मोटर्सको विक्री २७ प्रतिशतले बढेको छ । 

कम्पनीको विद्युतीय गाडी तर्फको व्यापार भने ५ गुणाले बढेको भारतीय सञ्चार माध्यमले उल्लेख गरेका छन् । टाटा, महिन्द्रालगायतका गाडीको विक्री बढ्दा हुण्डाई मोटर्सको विक्री भने ११ प्रतिशतले घटेको बताइएको छ ।

टाटाले जनवरीमा ७६ हजार २१० सवारी साधन विक्री गरेको छ । कम्पनीका अनुसार २०२१ को सोहि महीनामा ५९ हजार ८६६ ओटा सवारी साधन विक्री गरेको थियो । 

भारतको घरेलु सवारी साधन निर्माता कम्पनी टाटाले भारतीय बजारमा मात्रै २६ प्रतिशतले विक्री बढाउन सफल भएको हो । जुन ७२ हजार ४८५ हो। गत वर्षको जनवरीमा भारतीय बजारमा मात्रै ५७ हजार ६४९ ओटा सवारी विक्री भएका थिए ।

टाटा मोटर्सले उत्पादन गर्ने ईलेक्ट्रिक मोटर्सको विक्री पनि पाँच गुणाले बढेको बताएको छ । २०२१ को जनवरीमा जम्मा ५१४ ओटा मात्र ईलेक्ट्रिक सवारी विक्री गरेको टाटाले यो वर्षको सोहि महीनामा २ हजार ८९२ ओटा विद्यूतीय सवारी विक्रि गरेको छ ।

त्यस्तै महिन्द्रा गाडीको विक्री २० प्रतिशतले बढेको छ । गत वर्षको यसै महीनामा ३९ हजार १४९ ओटा मात्रै सवारी विक्रि गरेको महिन्द्राले यो जनवरीमा भने ४६ हजार ८०४ ओटा सवारी विक्री गरेको हो । 

उसले घरेलु बजारमा मात्रै १९ हजार ९६४ ओटा सवारी विक्री गरेको छ । गत वर्ष सोहि महीनामा २० हजार ६३४ ओटा सवारी विक्री गरेको थियो । जनवरीमा महिन्द्राले २ हजार ८०० सवारी साधन निर्यात गरेको छ । महिन्द्राले गत वर्षको सोहि महीनामा २ हजार २८६ ओटा सवारी निर्यात गरेको थियो ।

त्यस्तै हुण्डाईको विक्रीमा भने ११ प्रतिशतले गिरावट आएको छ ।  गत बर्ष ६० हजार १०५ सवारी विक्री गरेको कम्पनीले गत जनवरीमा ५३ हजार ४२७ ओटा मात्रै सवारी विक्रि गर्न सकेको छ । हुण्डाईको घरेलु बजारमा समेत १५ प्रतिशतले विक्री कम भएको जनाईएको छ ।