देशभर ९९ जना कोरोना संक्रमित आईसीयू र भेन्टिलेटरमा

देशभर ९९ जना कोरोना संक्रमित उपचाररतमध्ये ५० प्रतिशतभन्दा बढी काठमाडौं उपत्यकामा उपचाररत रहेको पाइएको छ । स्वास्थ्य मन्त्रालयले दिएको जानकारीअनुसार ३४ जना आईसीयू र १६ जनाले भेन्टिलेटरमा उपत्यकाका विभिन्न अस्पतालमा उपचार गराइरहेका छन् ।

हाल नेपालमा ४ हजार ९ सय ६ जना संक्रिय संक्रमितमध्ये ९९ जना कोरोना संक्रमित विभिन्न आईसीयू र भेन्टिलेटरमा उपचार गराइरहेका छन् । आइतबारसम्मको तथ्यांकअनुसार देशभर ७४ संक्रमित आईसीयूमा र २४ भेन्टिलेटरमा उपचाररत रहेको देखिएको छ ।

उपचाररतमध्ये ५० प्रतिशत काठमाडौंमा

स्वास्थ्य मन्त्रालयको तथ्यांकअनुसार प्रदेश १ मा १५ जना आईसीयूमा र ६ जना भेन्टिलेटरमा उपचाररत छन् । प्रदेश २ मा २ जना आईसीयूमा उपचाररत छन् भने बाग्मती प्रदेशमा ४७ जना आईसीयूमा र १६ जना भेन्टिलेटरमा उपचारत छन् ।

गण्डकी प्रदेशमा दुई जना आईसीयूमा उपचाररत छन् । त्यस्तै, लुम्बिनी प्रदेशमा ६ जना आईसीयूमा र एक जना भेन्टिलेटरमा उपचाररत छन् । कर्णाली प्रदेशमा एक जना आईसीयूमा उपचाररत छन् भने सुदूरपश्चिममा दुई जना आईसीयूमा र एक जना भेन्टिलेटरमा उपचाररत छन् । हालसम्म मृतकको कुल संख्या ११ हजार ५ सय ८५ पुगेको छ ।

नेपालमा दैनिक नयाँ संक्रमित थपिँदै
स्वास्थ्य मन्त्रालयको तथ्यांकअनुसार ४ पुसदेखि ११ पुस आइतबारसम्म १ हजार ६ सय ७४ जना कोरोना संक्रमित थपिएका छन् । दुई हप्ताअघि यसै अनुपातमा साप्ताहिक संक्रमण दर १ हजार ६ सय २३ रहेको थियो ।

संक्रमणदर बढे पनि मृत्युदर भने केही घटेको देखिएको छ । दुई हप्ताअघि कोरोनाबाट मृत्यु हुने संख्या १९ रहेकोमा यसै हप्ता सो दर ११ मा झरेको छ । मन्त्रालयको तथ्यांक हेर्दा देशभरको संक्रमण दरको अनुपात विश्लेषण गर्दा पछिल्लो केही समय यता काठमाडौं उपत्यकामा मात्रै दैनिक ६० दशमलव ६ प्रतिशतले कोरोना संक्रमण बढिरहेको पाइएको छ । हाल काठमाडौंमा मात्रै ७ सय ४५ सक्रिय संक्रमित छन् । ललितपुरमा ६ सय १६ जना र भक्तपुरमा ४ सय ९९ जना सक्रिय संक्रमित रहेको स्वास्थ्य मन्त्रालयको तथ्यांकमा उल्लेख छ ।

४ पुसदेखि ११ पुससम्मको विश्लेषण गर्दा २ दशमलव शून्य २ प्रतिशतदेखि ८ प्रतिशतसम्मले बढेको देखिएको छ । सबैभन्दा बढी गत हप्ताको सोमबार कोरोना संक्रमित ८ प्रतिशतले बढेको थियो भने सबैभन्दा कम गत मंगलबार २ दशमलव शून्य २ प्रतिशतले बढेको थियो । गत साताको मंगलबारपछि भने कोरोना संक्रमण बढिरहेको तथ्यांकले देखाएको छ ।यो समाचार राजधानी दैनिकबाट लिएको हो।