२१ असार २०७९, मंगलवार
July 5, 2022, Tuesday

महामारीले चिनियाँ नाकामा समस्या, स्थानीय व्यापारी चिन्तित

महामारीले चिनियाँ नाकामा समस्या, स्थानीय व्यापारी चिन्तित

कोरोना महामारीले तातोपानी नाकाबाट हुने व्यापारमा समस्या भएको छ । चिनियाँ पक्षले महामारी र विपद् देखाएर एकतर्फी ढंगले नाका खोल्ने र बन्द गर्ने गर्दा व्यापारमा समस्या भएको हो । तातोपानी र केरुङ नाकामा समस्या देखिएपछि व्यवसायी व्यापारबाटै पलायन हुने क्रम बढेको छ । दुबै नाकामा विभिन्न बहानामा चीनले न्यून रुपमा मात्रै कारोबार गर्दे आएको छ ।

नेपाल हिमालय सीमापार वाणिज्य संघका अध्यक्ष अशोक श्रेष्ठका अनुसार २०७२ सालको भूकम्पपछि चीनले दुबै नाकाबाट निर्यात गरेको छैन । ‘चीनले न्यून रुपमा एकतर्फी आयात मात्रै गरेको छ’, श्रेष्ठ भन्नुहुन्छ, ‘पूर्ण रुपमा नाका नखुल्दा राज्यलाई हरेक वर्ष अर्बाै घाटा भएको छ ।’

दैनिक सामाना आयातको अवस्था
तातोपानी सुख्खा बन्दरगाह तथा भन्सार कार्यालयका प्रमुख नारद गौतम नाकाबाट दैनिक केही सामान आयात भइरहेको बताउनुहुन्छ । गौतमका अनुसार तातोपानी नाकाबाट दैनिक सात टेलर रोल कपडा, मेसिनरी सामान र केही रेडिमेड सामान आइरहेको छ । औपचारिक रुपमा नाका बन्द भएको घोषणा नगरे पनि चिनियाँ पक्षले महामारी र विपद् देखाएर कन्टेनर नआएको उहाँको भनाइ छ ।

गत महिना चीनको ल्हासास्थित नेपाली महावाणिज्य दूतावासमा बसेको दुई देशका उच्च अधिकारीको बैठकले कन्टेनर आयातको विषयमा निर्णय गरेको थियो । बैठकमा तातोपानी र केरुङ नाकाबाट दैनिक २० कन्टेनर पठाउने निर्णय भए पनि उक्त निर्णय भने अझैसम्म कार्यान्वयन नभएको सीमापार वाणिज्य संघका अध्यक्ष श्रेष्ठले बताउनुहुन्छ ।

नाका अवरोधको शृङ्खला
गत पुस १६ गते चीनको खासा, न्यालाम क्षेत्रमा करिब सात फिट बाक्लो हिमपातका कारण चिनियाँ कन्टेनर उक्त क्षेत्रमा नै रोकिए । सो कारण नेपाली व्यापारीले ल्याएका सामान झण्डै दुई साता चिनियाँ क्षेत्रमा रोकिएका थिए । हिउँले सबै सामान काम नलाग्ने भए ।

२०७७ सालमा कोरोना भाइरस संक्रमण बढेपछि चीनले तातोपानी नाका पूर्ण रुपमा बन्द गरेको थियो । नेपालको तातोपानी र चीनको खासा, न्यालम लगायतका क्षेत्रमा संक्रमित भेटिएपछि दुई महिनाभन्दा बढी समय चीनले नाका बन्द गरेको थियो । नेपाली व्यापारीले आयात गर्न लागेका सयौं कन्टेनर त्यो समय चिनियाँ भूमिमै रोकिए । त्यसले व्यापारमा करोडौ घाटा भयो ।

२०७६ जेठमा तिब्बतको स्थानीय प्रशासन न्यालम कन्ट्रीले खासा क्षेत्रभन्दा ३५ किलोमिटरमाथि रहेको ‘क्यानोन कू’ ताल फुट्न लागेको भन्दै तीन महिनाभन्दा बढी समय चीनले नाका पूर्णरुपमा बन्द गरेको थियो । २०७२ सालको भूकम्पमा दुई देशबीचको मितेरी पुल क्षतिग्रस्त हुँदा व्यापार ठप्प भयो ।

२०७१ साल साउन १७ गतेको जुरे पहिरोलाई बाधक देखाउदैं चीनले एकतर्फी रुपमा तातोपानी नाकाबाट कारोबार बन्दा गर्दा नेपाली व्यापारीले करोडौं घाटा खेपे । २०७५ जेठ १५ गते नेपाल सरकार र सिन्धुपाल्चोक उद्योग वाणिज्य संघ, नेपाल हिमालय सीमापार वाणिज्य संघ, व्यापारी, व्यवसायीको आग्रहमा चीनले तातोपानी नाका खुलाएको थियो । चीनले नाका खोले पनि पूर्णरुपमा सञ्चालन हुनसकेन ।

नाका खुलाउन सिन्धुपाल्चोक उद्योग वाणिज्य संघ, नेपाल हिमालय सीमापार वाणिज्य संघले संयुक्त रुपमा प्रधानमन्त्री शेरबहादुर देउवा, पराराष्ट्रमन्त्री नारायण खड्कालाई ज्ञापनपत्र बुझाएको सिन्धुपाल्चोक उद्योग वाणिज्य संघका अध्यक्ष होमबहादुर बस्नेतले जानकारी दिनुभयो । सरकारले नाका खुला गर्न पटकपटक अनुरोध गरे पनि चीनले त्यसलाई बेवास्ता गरेको छ ।यो समाचार गोरखापत्रबाट लिएको हो।

Related News

मतदाता नामावलीमा नाम दर्ता गर्न के–के कागजात चाहिन्छ ?
मतदाता नामावलीमा नाम दर्ता गर्न के–के कागजात चाहिन्छ ?
  • ११ माघ २०७८, मंगलवार

सरकारले असार १ गतेदेखि मतदाता नामावलीमा नाम दर्ता गरिरहेको छ । यसअघि मतदाता नामावलीमा नाम दर्ता गर्न छुटेका तथा भर्खरै...

बङ्गुरपालकलाई बजार अभाव
बङ्गुरपालकलाई बजार अभाव
  • ११ माघ २०७८, मंगलवार

कञ्चनपुरमा बङ्गुरपालकको संख्या बढेसँगै बजारको अभाव हुन थालेको छ । बजार अभाव भएपछि बङ्गुरपालक सस्तोमै बङ्गुर बेच्न बाध्य भएका छन्...

भेरी–बबई डाइभर्सन आयोजना सकिन तीन वर्ष लाग्ने, ५६ प्रतिशत काम सम्पन्न
भेरी–बबई डाइभर्सन आयोजना सकिन तीन वर्ष लाग्ने, ५६ प्रतिशत काम सम्पन्न
  • ११ माघ २०७८, मंगलवार

राष्ट्रिय गौरवको आयोजना अन्तर्गत रहेको भेरी–बबई डाइभर्सन आयोजनाको निर्माण सक्न अझै तीन वर्ष लाग्ने देखिएको छ । याे आयोजनाको हालसम्म...

TOP