२ कार्तिक २०७८, मंगलवार
October 19, 2021, Tuesday

काठमाडौं र केरुङ जोड्न सुरुङमार्गः अढाइ घण्टामै सीमापार !

काठमाडौं र केरुङ जोड्न सुरुङमार्गः अढाइ घण्टामै सीमापार !

टोखा-छहरे सुरुङको लम्बाइ ४.२ किलोमिटर

२१ पुस, काठमाडौं । ‘प्राइमिनिस्टर इन वेटिङ’ केपी ओलीले चीन सीमावर्ती रसुवागढी पुगेर काठमाडौंबाट नाकासम्म चार लेनको सडक बनाउने बताएको धेरै दिन भएको छैन । यसबीचमा काठमाडौं र चीनसँगको व्यापारिक नाका रसुवागढीलाई सडकमार्गबाट नजिक्याउने गरी तयार भएको सुरुङमार्ग निर्माणको प्रस्ताव अर्थ मन्त्रालयमा पुगेको छ ।

सडक विभागले काठमाडौंको टोखाबाट नुवाकोटको छहरेसम्म बन्ने सुरुङमार्गको प्रारम्भिक अध्ययन सकेर अर्थ मन्त्रालयमा निर्माणका लागि वैदेशिक सहायता जुटाउन प्रस्ताव गरेको छ ।

सुरुङमार्ग र त्यसलाई गल्छी-स्याफ्रुबेंसी सडकमा जोड्ने पहुँच मार्ग बनाउन साढे २६ अर्ब रुपैयाँ लाग्ने अनुमान गरिएको विभागको वैदेशिक सहयोग समन्वय महाशाखाका प्रमुख सञ्जयकुमार श्रेष्ठले अनलाइनखबरलाई जानकारी दिए ।

उक्त परियोजना निर्माणका लागि सरकारले चीनमा मुख्य कार्यालय रहेको एसियन इन्फ्रास्ट्रक्चर डेभेलपमेन्ट बैंक (एआईडीबी)लाई अनुरोध गरिसकेको छ । उक्त बैंकले सकारात्मक प्रतिक्रिया दिएको अर्थ मन्त्रालय स्रोतको दाबी छ । बैंकले त्यसबारे थप अध्ययन गरेर प्रस्ताव ल्याउन आग्रह गरेको छ ।

आगामी आर्थिक वर्षको बजेटमा त्यसका लागि रकम विनियोजन गरेर अध्ययन अगाडि बढाउने सरकारी योजना छ । चाँडै गठन हुने नयाँ सरकारले निर्माणको मोडालिटी टुंगो लगाउने अपेक्षा सडक विभागका अधिकारीहरुको छ ।

‘रसुवागढीसम्म जाने सहज र भरपर्दो मार्ग’

काठमाडौंको टोखाबाट नुवाकोटको थानसिंह फाँटछेउ पुग्ने उक्त सुरुङ करिब चार दशमलव दुई किलोमिटरको हुनेछ । टोखासम्म सडक विस्तार भइसकेको छ ।

साढे २६ अर्ब लागत अनुमान गरिएको प्रस्ताव सडक विभागबाट अर्थ मन्त्रालयमा, चिनियाँ लगानी बैंकको सकारात्मक प्रतिक्रिया

थानसिंह फाँटबाट नुवाकोट र रसुवाका विभिन्न खोलाका तीरैतीर निर्माण हुने सडक गल्छी-स्याफ्रुबेंसी खण्डमा जोडिनेछ । सुरुङ र पहुँच मार्ग निर्माणपछि काठमाडौंबाट रसुवागढी अढाइ घण्टाको ‘ड्राइभिङ’मै पुग्न सकिनेछ ।

उक्त मार्गमा पहिरोको जोखिम पनि कम छ । खोलाको किनारबाट निर्माण हुने भएकाले बनाउन पनि सजिलो हुने अपेक्षा छ ।

सुरुङलाई पासाङल्हामु राजमार्गसँग जोड्न ३५ किमिको पहुँचमार्ग पनि निर्माण गर्नुपर्नेछ । अहिले चीनले रसुवागढी र स्याफ्रुबेंसीबीचको १६ किमि सडक दुईलेनमा स्तरोन्नती गर्न अध्ययन सकेको छ ।

रसुवागढी-स्याफ्रुबेंसी सडक र टोखा-छहरे सुरुङमार्ग बनेपछि चीनसँग काठमाडौंको दूरी अझै नजिकिनेछ ।

‘विस्तृत अध्ययन हुन बाँकी छ । अध्ययनपछि पनि यस क्षेत्रमा विभिन्न परिवर्तनहरु भएका छन्,’ श्रेष्ठ भन्छन्, ‘तर, आधारभूत रुपमा रसुवागढीसम्म जाने सहज र भरपर्दो मार्गको विकल्प बन्न सक्छ यो ।’

चीन सरकारले तातोपानी नाका बन्द गरेर हिले-रसुवागढी नाकालाई प्राथमिकतामा राखेको छ । तिब्बतीहरुको चीनविरोधी गतिविधि बढेको बताउँदै सामरिक रुपमा तातोपानी खोल्नुभन्दा रसुवागढीलाई अन्तर्राष्ट्रिय नाकामा स्तरोन्नती गर्ने चीनको इच्छा छ ।

सोहीअनुरुप रसुवागढी पुग्न सहज मार्गको खोजी भइरहेको थियो । गल्छीबाट स्याफ्रुबेंसी पुग्ने सडक निकै साँघुरो र जोखिमयुक्त छ, अहिले । एक लेनको सडकमा विभिन्न स्थानमा पहिरो खसेका कारण सवारी दुर्घटनाको जोखिम उच्च छ ।

त्यसको विकल्पमा सुरुङमार्गसहित नयाँ सडकको विकल्पमाथि अध्ययन भएको हो । अध्ययनबाट सुरुङमार्गसहित वैकल्पिक सडक निर्माण गर्न सकिने देखिएपछि सडक विभागले अर्थ मन्त्रालयमा प्रस्ताव लगेको हो ।

विभिन्न चिनियाँ कम्पनीले इन्जिनियरिङ, खरिद, निर्माण तथा फाइनान्सिङ (ईपीसीएफ) मोडेलमा उक्त सुरुङमार्गमा लगानी गर्न इच्छा देखाएका छन् । तर, सरकारले यसलाई कसको सहयोगमा र कसरी निर्माण गर्ने भन्ने निर्णय गरेको छैन ।

सम्भवतः नयाँ सरकार आउनासाथ यसबारे अन्तिम निर्णय भएर डीपीआर निर्माण अगाडि बढ्ने सडक विभागका अधिकारीहरु बताउँछन् । यसमा चीनकै सहयोग लिने सम्भावना उच्च छ ।

पूर्वसचिव तुलसीप्रसाद सिटौला पनि उक्त सडक मार्ग निर्माण भएपछि चीनसँग काठमाडौंको ‘रोड कनेक्सन’ दरिलो बन्ने बताउँछन् । यो योजना सफल भए रसुवागढी नाकालाई अन्तर्राष्ट्रिय स्तरको बनाउन थप सहज हुने अपेक्षा गरिएको छ ।

चीनसँगको नाका जोड्ने सडकमा भौगोलिक हिसाबले आउने अवरोध छल्न सुरुङमार्गसहितको सडक सहयोगी बन्नेछ । उक्त सुरुङ र सडक निर्माणपछि राम्चे र ग्राङको पहिरोका कारण वषर्ायाममा आपूर्ति अवरुद्ध हुने समस्या पनि बाँकी रहने छैन ।

धुलिखेल सडकमा पनि सुरुङ

तातोपानी नाका जोड्ने अरनिको राजमार्गको सूर्यविनायक-धुलिखेल खण्डमा पनि सुरुङ निर्माणसम्बन्धि अध्ययन भइरहेको छ । उक्त सडकलाई आठ लेनको बनाउने सरकारी योजना छ । उक्त सडक र सुरुङमा जापानले लगानी गर्दैछ ।

आगामी फेब्रुअरीमा नेपाल र जापानबीच द्विपक्षीय बैठक हुँदैछ । सोही बैठकले यससम्बन्धि निर्णय लिने महाशाखा प्रमुख श्रेष्ठ बताउँछन् । कोटेश्वर-सूर्यविनायक सडक विस्तारमा लगानी गरेको जापानले धुलिखेलसम्मको थप १६ किमि खण्ड पनि आठ लेनको बनाइदिन लागेको हो ।

उक्त खण्डमा भक्तपुरको पलाँसेबाट सुरुङ खन्ने विकल्पमा अध्ययन भएको छ । त्यसको लम्बाइ र अन्तिम विन्दु भने निर्णय हुन बाँकी छ । धुलिखेल सडकमा धेरै घुम्ती भएकाले सुरुङमार्ग नै बनाउने योजनामा अध्ययन भएको हो ।

उक्त खण्डको स्तरोन्नतीपछि अरनिको र बीपी राजमार्गसहित दोलखा, खोटाङ, रामेछापलगायत लामो दूरीका गन्तव्यका बसलाई धुलिखेलसम्म मात्र आउन दिने र त्यहीँबाट छुटाउने व्यवस्था गर्न सहज हुनेछ ।

Source: Online Khabar

Related News

माईतीघर मण्डलामा १८ बर्षीय नुभिव उप्रेतीको हत्या प्रकरणका बारेमा शान्तीपुर्ण आन्दोलन तथा दिप प्रज्वलन
माईतीघर मण्डलामा १८ बर्षीय नुभिव उप्रेतीको हत्या प्रकरणका बारेमा शान्तीपुर्ण आन्दोलन तथा दिप प्रज्वलन
  • २१ पुष २०७४, शुक्रबार

न्यायको लागि शान्तीपूर्ण आवाज तथा दिप प्रज्वलन आज साझ माईतीघर मण्डलामा १८ बर्षीय नुभिव उप्रेतीको हत्या प्रकरणका बारेमा शान्तीपुर्ण आन्दोलन...

तालिम तथा रोजगार व्यावसायी महासंघ(FPTEN)को महाधिवेसन सम्पन्न – केन्द्रिय​ अध्यक्षमा अच्युत नेपाल​ र​ बागमतिमा बद्रि प्रसाद दाहाल​
तालिम तथा रोजगार व्यावसायी महासंघ(FPTEN)को महाधिवेसन सम्पन्न – केन्द्रिय​ अध्यक्षमा अच्युत नेपाल​ र​ बागमतिमा बद्रि प्रसाद दाहाल​
  • २१ पुष २०७४, शुक्रबार

काठमाडौ – नेपाल तालिम तथा रोजगार व्यावसायी महासंघ(FPTEN)को दोस्रो महाधिवेसन काठमाडौमा सम्पन्न भ​एको छ र अच्युत नेपालको नेतृत्वमा ३१ जनाको...

जनकलाल शर्मा स्मृति शतबार्षिकी भर्चुअल कार्यक्रम भव्यताका साथ सम्पन्न
जनकलाल शर्मा स्मृति शतबार्षिकी भर्चुअल कार्यक्रम भव्यताका साथ सम्पन्न
  • २१ पुष २०७४, शुक्रबार

बैशाख १७, २०७८ इलाम, क्याबुङ, क्याबुङ विकास प्रतिष्ठानको आयोजना तथा नेपाल प्रज्ञा प्रतिष्ठानको सहकार्यमा जनकलाल शर्मा स्मृति शतवार्षिकी भर्चुअल कार्यक्रम...

TOP