६ बैशाख २०७८, सोमबार
April 19, 2021, Monday

धुर्मुस सुन्तलीलाई अझै २ करोडको अपुग

धुर्मुस सुन्तलीलाई अझै २ करोडको अपुग

रौतहट चन्द्रपुर–८ का ४७ घर बाढीपीडित परिवारलाई हास्य कलाकार दम्पत्ति सीताराम कट्टेल ‘धुर्मुस‘ र कुञ्जना घिमिरे ‘सुन्तली’ले एकीकृत बस्ती बनाउँदैछन् ।

गत साउन अन्तिम साता आएको बाढीले विध्वंश मच्चाएको रौतहट सन्तपुरका विपन्न एवम् दलित परिवारका लागि उनीहरूले धुर्मुस–सुन्तली फाउन्डेशनबाट नमुना एकीकृत बस्ती बनाउन थालेका हुन् । असोज २८ गतेबाट निर्माण प्रारम्भ गरिएको सन्तपुर नमुना बस्तीको ८० प्रतिशत निर्माण कार्य पूरा भएको धुुर्मुसले जानकारी दिए ।

माघ २४ गते हस्तान्तरण

माघ २४ गते बस्ती हस्तान्तरण गर्ने लक्ष्य लिएकाले बस्ती सोचेभन्दा चाँडो निर्माण भइरहेको धुुर्मुसको दाबी छ । ५ करोड ९५ लाख अनुमानित लागतको बस्ती बनाउन २ सय ६१ कामदार खटिएका छन् । “बिहान ६ः१५ बजेदेखि नै काम सुरू हुन्छ । राति अबेरसम्म कार्यक्षेत्रमै हुन्छौँ,” उनले भने ।

तीन–चार दिनयता चिसो बढेकाले काम गर्न असहज भए पनि बस्ती हस्तान्तरणको मिति नजिकिएकाले चिसोका बाबजुत काम भइरहेको उनले बताए ।

यस्तो बन्दैछ बस्ती

४७ वटा घर, एउटा बालउद्यान, एउटा भ्यू टावर, मन्दिर, सामुदायिक भवन, अपांगतामैत्री, बालमैत्री, वातावरणमैत्री संरचना भएकाले बस्ती नमुनामात्र नभएर अर्थपूर्ण रहेको उनको जिकिर छ । त्यसबाट २८२ जनसंख्या लाभान्वित हुनेछन् ।

वर्र्षौंदेखि पीडामा रहेका, पुस्तैनी दुःखमा जकडिएका समुदायको विकासका निम्ति बस्ती कोशेढुंगा सावित भएको र यसले विकासको लहर ल्याउन मद्दत पुर्याएको उनको दाबी छ ।

पछिल्लो समय तराईमा चिसो बढेको र गत वर्षामा बाढी पसेका बस्तीका पीडितहरू मर्कामा परे पनि कसैको ध्यान नगएको उनको दुःखेसो थियो ।
“पछिल्लो समय बाढीको चपेटामा परेकाहरू ओझेलमा परेका छन् । बाढी पसेका बस्तीका बालबालिकाहरू चिसोले कठ्यांग्रिएका छन् । तिनको आङमा एकसरो लुगा पनि छैन, सबैको ध्यान त्यता जानुपर्छ,” उनले बाह्रखरीसँग भने ।

अझ २ करोड अपुग

५ करोड ९५ लाख लागत अनुमानित गरिए पनि त्यो भन्दा कममै बस्ती बनाउने प्रयास गरिएको धुर्मुसको भनाइ छ । “गिटी, बालुवा, सिमेन्टी खरिदमा म आफैँ खटिएको छु । त्यस्तै परे आफैँ बोक्छु, लागत घटाउने प्रयत्न गरेको छु,” उनले भने ।

तथापि बस्ती बनाउन रकम अपुग भएको उनको गुनासो छ । पछिल्लो समय मुलुक निर्वाचनमा होमियो । बाढी लगत्तै सुरू भएको निर्वाचनको माहोल अझै चिसिएको छैन । त्यसैले बस्तीतिर मानिसको ध्यान कम जाने र रकमको जोहो कम हुने हो कि भन्ने चिन्ता पनि थियो उनलाई । तर, सहयोगीहरूले बस्तीमै पुगेर रकम हस्तान्तरण गरिरहेकाले हस्तान्तरणको मितिसम्म रकम जुगाड हुनेमा उनी ढुक्क छन् ।

“अझै २ करोड अपुग छ तथापि रकम संकलन हुनेमा म विश्वस्त छु,” उनले थपे ।

हालसम्म ४७ वटै घर निर्माण सम्पन्न भइसकेको छ भने छानामा जस्तापाता हाल्न बाँकी छ । त्यस्तै, मन्दिर र भित्रि बाटो निर्माणको काम भइरहेकाले ४४ दिनभन्दा अगावै बस्ती निर्माण पूरा हुनेमा ढुक्क छन् उनी ।

असोज २८ गतेयता धुर्मुस निरन्तर बाढी पीडितको सेवामा खटिएका छन् । धुर्मुस सुन्तली फाउन्डेशनको यो चौथो परियोजना हो । यसअघि ०७२ सालमा काभ्रे डाँडा गाउँका भूकम्पपीडित २० घर परिवारलाई एकीकृत बस्ती बनाएको थियो । त्यस्तै ०७३ सालमा सिन्धुपाल्चोक गिरानचौरका ६५ घर भूकम्पपीडित परिवारलाई एकीकृत नमुना बस्ती, ०७३ सालमै महोत्तरी, बर्दिबासका ५४ घर मुसहर समुदायका लागि एकीकृत नमुना बस्ती पनि फाउन्डेसनले बनाइसकेको छ ।

त्यस्तै फाउन्डेसनले ५ अर्ब अनुमानित लागत रहेको ‘विश्वले चिन्नेछ नेपाल, नेपालभित्रको नमुना नेपाल’ परियोजना पनि ललितपुरको लेलेमा सुरू गरिसकेको छ ।

Related News

आयुर्वेद उद्योगलाई नयाँ उचाईमा पुर्याउन औषधी व्यवस्था विभाग र आयुर्वेद औषधि उत्पादक संघ बीच बिशेष छलफल
आयुर्वेद उद्योगलाई नयाँ उचाईमा पुर्याउन औषधी व्यवस्था विभाग र आयुर्वेद औषधि उत्पादक संघ बीच बिशेष छलफल
  • १२ पुष २०७४, बुधबार

 Namaraj Bhatta, Source: Healthnewsnepal काठमाडौं, २१ कार्तिक २०७७ नेपाल औषधि व्यवस्था विभाग र नेपाल आयुर्वेद औषधि उत्पादक संघ (AMPAN) बीच...

नेपाल तालिम तथा रोजगार व्यवसायी महासंघको आयोजनामा एक दिवसीय भर्चुअल प्रथम बागमती प्रदेश अधिवेसन आयोजना हुँदै
नेपाल तालिम तथा रोजगार व्यवसायी महासंघको आयोजनामा एक दिवसीय भर्चुअल प्रथम बागमती प्रदेश अधिवेसन आयोजना हुँदै
  • १२ पुष २०७४, बुधबार

यहि श्रावण ३१ गते शनिवार विहान ८ बजेबाट प्राविधिक र सीपमूलक जनशक्ति उत्पादन गर्दै तालिम र रोजगारका क्षेत्रमा दुई दशक...

नेपाल समाजबादि काग्रेसको पत्रकार भेटघाट कार्यक्रम सम्पन्न
नेपाल समाजबादि काग्रेसको पत्रकार भेटघाट कार्यक्रम सम्पन्न
  • १२ पुष २०७४, बुधबार

नेपाल समाजबादि काग्रेस ले आज आफ्नो केन्द्रिय कार्यलय मा पत्रकार भेटघाट कार्यक्रम सम्पन्न गरेको छ ।कार्यक्रम मा समसामयिक राजनीतिमा आफ्नो...

TOP