दिल्लीको प्रदुषणले भारत-श्रीलंका टेष्ट प्रभावित,

December 4, 2017

दिल्लीको फिरोज शाह कोटला स्टेडियममा भइरहेको टेष्टमा श्रीलंकाली खेलाडीहरुले पोल्यूशन मास्क लगाएको देखियो । दिल्लीको प्रदुषण सहन नसकेपछि खेलाडी मास्क लगाएर मैदानमा आएका थिए ।

तेस्रो तथा अन्तिम टेष्टमा भारतले ७ विकेट गुमाएर ५३६ रन बनाएर पहिलो पारी समाप्तीको घोषणा गर्‍यो । कप्तान विराट कोहलीले २४३ रन बनाए भने मुरली विजयले १५५ रन बनाए ।

जवाफमा श्रीलंकाको सुरुवात खराब रहृयो तर, खेलको दौरान श्रीलंकाली खेलाडीहरुले मास्क लगाए । उनीहरुले प्रदुषणबाट बच्न मास्क लगाएका हुन् ।

दिल्लीमा आइतबार एयर क्वालिटी इन्डेक्स दिउँसो १ बजेको हावामा पीएम २.५ स्तर (निकै हानिकरक) थियो ।

दोस्रो दिनको खेल चल्दै गर्दा दिल्लीको प्रदुषित हावाका कारण श्रीलंकाका खेलाडीहरु अस्वस्थ बनेपछि भारतले इनिङ समाप्तिको घोषणा गर्नुपर्ने अवस्था सिर्जना भयो ।

प्रदुषणले खेल दुईपटक अवरुद्ध भएको थियो, १७ मिनेट र पाँच मिनेट । श्रीलंकाका ट्रेनर निक ली ११ औं खेलाडी बनेर मैदानमा पस्दासमेत खेलाडी अपुग हुन गएपछि वाध्य भएर इनिङ समाप्त गर्नुपर्‍यो ।

लन्चपछिको सेसनमा कम्तिमा पाँच फिल्डरहरु मास्क लगाएर आएका थिए । भारतीय खेलाडीहरु भने प्रदुषणकै बीचमा पनि फिल्डिङ गर्न तयार भए ।

पछिल्लो हिउँदहरुमा दिल्लीमा प्रदुषणको अवस्था चिन्ताजनक बनिरहेको छ । यो वर्षको नोभेम्बरमा सरकारले जनस्वास्थ्य संकटकाल घोषणा गरेका थियो ।